mercoledì 12 marzo 2014

comme si te putesse chiamma'

Sta jurnata scorre fore 'o finestrino, è sera e nun se vede niente, comme si vedesse int'a capa. E penso: 'natu ppoco e so' arrivato, m'aizo e me mmesco cu e giubbini e borse e 'e giacche 'e 'llate;  'o treno se ferma e po' traso int'a 'sta fiummana 'e ggente che a poco a poco si dirada. Po',mmieze a quattro luci sulitarie, arrivo int'a machina, poso a borza e suspiro pe vutta' fore sta jurnata... e finalmente sto sulo. 

E allora aggia sulamente allunga' 'a mano e gira' 'a chiave, ma me vene 'a chiagnere e poi accummencio a singhiuzza' comm'a nu strunzo e me preme ncoppo 'o pietto 'na mano invisibile ca nunn'o vulesse fa asci' stu dolore, e invece esce 'o stesso comme fosse acqua int'a 'na butteglia girata troppo ambress... 

Me giro e dico papà comme si te putesse chiamma' e te tenesse affianco e te guardasse... e vulesse essere guardato comme cierti vvote me guardave tu cu chell'aria nu poco interrogativa e chi te vo' bbene e vo' capi' ccomme te l'adda da' stu consiglio. Po' magari me mettive sulo 'na mana ncapa int'e capille pe me fa forza e nun me dicive niente... E sto ca 'a capa girata comme si veramente te guardasse, e te chiammo comme a dicere si puo' vieneme a vede'

Po' me calmo m'asciutto ll'uocchie e aspetto comme niente fosse. Appiccio 'a radio, giro 'a chiave... 'e penso mo' turnamme 'a casa che nunn'e' fernuta.